PYRRHICA Saltatio

PYRRHICA Saltatio
vel a Pyrrhicho quodam Lacone, vel a Pyrrho, Achillis filio, inventa, armata peragebatur, vel cum cantu, vel sine cantu, ut videre licet ex Icone, quam e lapidibus antiquis expressam, in suum de Arte Gymn. opus, l. 2. c. 6. transtulit Hieron. Mercurialis: Inter Saltationis Bellicae genera praecipus, (cum enim armatis perageretur, in militaribus reponebatur exercitationibus) bellicrepa proin, teste Festô Pompeiô, Latinis dicta est. Nec vero in armis solum fiebat, sed praeterea imitabatur omnes corporis flexus, quibus et telorum, et cominus pugnantium ictus, exirent: ut in alterum latus declinando, cedendo retro, subsiliendo, humique se demittende. Imo et actus referebat, quibus hostis peteretur, gladiô, iaculô, sagittâ; idque et acriter et decore: queîs sine saltatio fuisset turpis et ingrata. Atque ex his liquet, non saltâsse modo, sed etiam manibus gesticulatos esse; eoque Πυῤῥίχην aliter χειρονομίαν esse dictam, legimus apud Athenaeum, l. 14. et Eustat. Il. v. Habuerunt eam, inter exercitationes, Lacones inprimis, teste Fabiô, l. 1. c. 19. Cretenses quoque illam pueros addocebant, ut discimus ex Nic. Damasceno, apud Stobaeum, Eclogâ 42. Ad Romanos inde transiit, apud quos Troianum ludum, memoratum Suetonis, in Tiber. c. 6. pro Pyrrhica usurpari, sunt qui dicant: Verum dum utrum que horum cum Luctis Iuvenilibus, a Nerone institutis, confundit Alex. Neapolitanus, Genial. dier. l. 6. c. 19. hallucinatur non leviter, cum isti ludi effeminati admodum et molles, cum militari illo exercitationis genere, nihil penitus commune habuerint. Exercebantur vero hâc saltatione, non modo Tirones et Milites, sed nobilissimi quiave Adolescentes, Principes interdum ipsi. Imo Sueton. in Nerone, c. 12. dicens, Echibuit Pyrrhicas quasdam e numero Epheborum, quibus post editam operam diplomata civitatis Rom. obtulit: ignobiles quoque servilisque conditionis homines Pyrrhicam lusisse, innuit. Adde et vilissima Bestiariroum capita, ex Ulpiano ICto, l. 8. ff. de poen. Puellas item, ex Appuleio, Milesiar. l. 10. Praecipuusin ea gladii usus: Musicus concentus fistulis peragebatur, Amm. Marcellinô teste, l. 16. in rebus Iuliani, praeeratque exercitiis aliquis summae auctoritatis, qui non modo hortari poterat, sed et coercendo Tirones impellere; ὁπλοδιδακτὴς in Veterib. Glossis, Campi doctor Scholiasti Iuven. Sat. 6. v. 260. Magister eidem, ad v. 87. Sat. 2. Isidoro Custos, l. 9. c. 8. Monitor Tertulliano, Apolog. c. 30. vocatur. vide supra. Proximae post cam dignitatis Ε᾿μμέλεια fuit, Voss. de 4. Artib. Popul. c. 3. §. 51. Sed et ei affinis erat, non tam funebris decursio, quam castrensis, parando gravioribus conflictibus militi instituta, apud Capitolin. Maximin. c. 5. Nostris temporibus illa pugnarum genera Pyrrhicas aemulantur, quas Morescas populari vocabulô Itali appellant. Plura vide apud Hier. Mercurialem, locô cit. et Thom. Dempster. Paralipom. in Rosin. l. 5. c. 25. Claudian. Panegyr. de quarto Honorii Consul. v. 626.
Mutatos edunt pariter tunc pectora motus,
In latus illisis clypeis, aut rursus in altum
Vibratis, grave parma sonat, mucronis acutum
Murmur et umbonum pulsu modulante resultans
Ferreus alternô concentus clauditur ense.
Coeterum militaris dicitur, Pyrrhica, apud Ael. Spartian. in Hadriano, c. 19. Militares pyrrhicas Populo frequenter exhibuit; non quod alia fuerit non militaris, sed quia hoc perpetuum eius epitheton est, Casaubon. ad loc. Salmas. vero ad eundem, aciem illam in armis saltantium, ex viris et mulieribus componi
solitam, et buxeis armis, non ex ferro fuisse instructam, docet ex hoc Epigr. ἀνεκδέτῳ, De PYRRHICA.
In spatio Veneris simulantur proelia Martis,
Cum sese adversum sexus uterque venit.
Femineam manibus nam confert Pyrrhica classem,
Et velut in morem militis arma movet.
Quae tamen haub ullo calibis sunt tecta rigore.
Sed solum reddunt buxea tela senum.
Sic alterna petunt iaculis, clypeisque teguntur,
Nec sibi congressis vir nocet aut mulier.
Lusus habet pugnam, sed habent certamina pacem:
Nam remeare iubent organa blanda pares.
Ubi organa fistulae sunt, uti discimus ex Ammiano, Artem modalantius incedendi per pyrrhicam concinentibus didicit fistulis, de Iuliano. Vide eundem Salmas. ad Solin. p. 171. ut et supra Dionysiaca Saltatio ac ubi de Orthio carmine.

Hofmann J. Lexicon universale. 1698.

Look at other dictionaries:

  • DIONYSIACA Saltatio — quae alias Pyrrhica, quoque dicta est, quod in ea Liberi Patris apud Indos gesta saltarent: postquam viz. eam nimis laboriosam prius, posteri mitiorem fecêre, pro lanceis, thyrsos, pro iaculis ferulas atque etiam lampadas, adhibentes,… …   Hofmann J. Lexicon universale

Share the article and excerpts

Direct link
Do a right-click on the link above
and select “Copy Link”

We are using cookies for the best presentation of our site. Continuing to use this site, you agree with this.